Ayrim viloyatlarda og‘ir atletika sport maktablari ochiladi: 2024-yil 1-sentyabr

2024-yil 1-sentyabrdan ayrim viloyatlarda ogʻir atletika sport turiga ixtisoslashtirilgan kompleks bolalar va oʻsmirlar sport maktablari ochiladi

O‘zbekiston Respublikasi Prezidentining “Ogʻir atletika sport turini yanada rivojlantirish chora-tadbirlari toʻgʻrisida”gi Qarori (PQ-137-son, 20.03.2024-y.) qabul qilindi. Ushbu qarorga ko‘ra, 2024-yil 1-sentyabrdan Respublika ixtisoslashtirilgan kompleks bolalar va oʻsmirlar sport maktabining Qoraqalpogʻiston Respublikasi, Namangan, Toshkent va Samarqand viloyatlarida hududiy maktablari ochiladi. Bu maktablarda ogʻir atletika sport turini rivojlantirishga alohida eʼtibor qaratiladi.

Bundan tashqari, joriy yildan boshlab har yili quyidagi musobaqalar o‘tkaziladi:

• Ogʻir atletika va parapauerlifting boʻyicha Markaziy Osiyo ochiq chempionati
• Ogʻir atletika va parapauerlifting boʻyicha “Uzbekistan Open” Oʻzbekiston ochiq chempionati
• Ogʻir atletika boʻyicha Xalqaro ogʻir atletika federatsiyasining tasdiqlangan norma va qoidalarida belgilangan yosh toifalari boʻyicha uch bosqichli (tuman/shahar, viloyat va respublika) chempionatlar va kuboklar
• Ogʻir atletika va parapauerlifting boʻyicha davlat sport-taʼlim muassasalari oʻrtasida Oʻzbekiston chempionati musobaqasi

Shuningdek, Sport vazirligi huzurida 2025/2026 o‘quv yilidan faoliyat boshlaydigan Ogʻir atletika markazi (Markaz) tashkil etiladi. Bu markaz mamlakatda ogʻir atletika sport turini yanada rivojlantirish va yangi avlod sportchilarini tayyorlash maqsadida tashkil etilmoqda.