Talabaga stipendiya qanday asosda tayinlanadi? To‘liq tushuntirish

Talabalar uchun stipendiya — moliyaviy qo‘llab-quvvatlovchi eng muhim omillardan biridir. Stipendiya olish tartibi esa, o‘qish asosiga qarab farqlanadi.

Grant asosida o‘qiydigan talabaga stipendiya tartibi

Grantda o‘qiyotgan talabalar uchun stipendiya o‘zlashtirish ko‘rsatkichiga qarab belgilanadi.

Kirish bosqichida tayinlanadigan stipendiya

Talaba birinchi marta o‘qishga kirganda, uning bilim darajasi hali aniqlanmagan bo‘ladi. Shu sababli unga avtomatik tarzda belgilangan miqdorda bazaviy stipendiya beriladi.

“A’lo” bahoga o‘qiganlar uchun qo‘shimcha

O‘quv semestri yakunida fanlarning barchasidan “a’lo” (86 ball va undan yuqori) baho olgan talabalarga stipendiya 20% ko‘paytirilgan holda to‘lanadi.

Qoniqarli baholar stipendiyaga ta’siri

Agar fanlarning 30% yoki undan ortig‘i “qoniqarli” (71 balldan past) baho bilan yopilgan bo‘lsa, keyingi semestr davomida stipendiya to‘xtatiladi.

Muhim eslatma:

Bu yerda GPA (umumiy o‘zlashtirish ko‘rsatkichi) emas, har bir fan bo‘yicha natijalar muhim. Masalan, talaba 10 ta fan o‘qisa va ulardan 3 tasidan 71 balldan past ball olsa — u stipendiyadan mahrum bo‘ladi. GPA hatto 85 bo‘lsa ham.

Kontrakt asosida o‘qiydigan talabaga stipendiya tartibi

Kontrakt asosida o‘qiyotgan talabalar uchun ham ayrim hollarda stipendiya tayinlanadi. Ammo bu holatlar kontrakt turi va o‘zlashtirish darajasiga bog‘liq.

Stipendiyali kontrakt bo‘yicha tahsil olayotganlar

Agar talaba to‘lov-kontrakt asosida va stipendiyali shartnoma bilan tahsil olsa, unga bazaviy stipendiya beriladi.

Agar u semestr oxirida fanlarning barchasidan “a’lo” baho olsa, stipendiyasi 20% ga oshiriladi.

Stipendiyasiz kontraktda o‘qiyotganlar uchun imkoniyat

Stipendiyasiz kontrakt asosida o‘qiyotganlar ham mukammal o‘zlashtirish (barcha fanlardan 86 ball va yuqoriroq) ko‘rsatsa, ularga 20% miqdorida stipendiya beriladi. Bu bazaviy stipendiya emas, faqat 20% lik rag‘bat sifatida belgilanadi.

Xulosa

• Grant asosida o‘qiyotgan talaba, agar 30% fanlardan past baho olsa, stipendiyasiz qoladi.

• O‘zlashtirishi a’lo bo‘lgan har qanday talaba 20% qo‘shimcha stipendiyaga ega bo‘ladi.

• Kontraktda o‘qiyotgan talabalar ham mukammal natija ko‘rsatsa, mukofotlanadi.

• GPA emas, har bir fan alohida baholanadi.

• Stipendiya olish uchun muntazam va sifatli o‘qish zarur.